Rev 5 | KYC | STEP | Nambame mendali kingi rolaerename pepa rongo pisi reto peteyamo kandeyo. Dokona paki pakipi laparaena pepa pyasi dokona bange porai isa roo dopale yanda ipingi nyepowame nyuo upi lao rambu lao pisiya.

Revelation of John 5

Pepa Rongo Pisi Buku Keyange Doko Kandeya

1 Nambame mendali kingi rolaerename pepa rongo pisi reto peteyamo kandeyo. Dokona paki pakipi laparaena pepa pyasi dokona bange porai isa roo dopale yanda ipingi nyepowame nyuo upi lao rambu lao pisiya. 2 Namba kandeyono dokopa aŋala ama poraindeme pii romende lapala, Akali api keyangendeme isa roo yanda ipingi nyepowame pepa rongo pisi upi leyami dupwa kapa pyao lumbanyi nembarase? leya. 3 Doko yake dokona mendemepe isa yuunya akali mendemepe yuu isa donorena akali mendemepe angi doko lumbwapala kandarami ingya naya. 4 Dokopa nambame pepa rongo pisi doko mendeme kapa pyuo lumbuo kando yaka lao pii narami doko sepala ee andake lao peteyo. 5 Ee lao peteyonosa akali wambake mendeme namba kando, Ee laa kae. Dapitinya rora ambusipi dokona pinginya kene pyao epeya Jutana rara dokona laene dokome anamasi minyapala isa roo pyakero upi leyami dupwa nyuo lumbunyi nembapala epeya kapa kandare leya.

6 Dopa leyamo dokopa Sipisipi Ikyane pyasi yalende, petenge isa andake suku dokona kareyamopa lee renge kisimape dee wambake dupwapeme nyuo kako pyao kareyami. Anatunya imambu yanda ipingi nyepo yuu muu dupwana mapanyi peeyamo dokona makande minyuo Sipisipi dokona kyawana nenge potemenge yanda ipingi nyepo karara, dee lenge yanda ipingi nyepoko rao siya. 7 Dokopa Sipisipi Ikyane dokome papala pepa rongo pisi akali dokome petenge isa andake dokona kingi rolaerename minyaro peteyamo doko nyiya. 8 Buku nyiyamo dokopa lee renge bange kisima dusipape dee akali wambake 24 dupwape Sipisipi Ikyane kando wapambu pii pyaro peteyami. Peteyami dokopa akali wambake dupwa mendaki mendaki lao rambyalu minyaro piso dee pere warake golome wasisi Kurisene wambunya ateŋa lenge dopale makande minyuo kyaa keyange piyamo minyaro peteyami piso 9 kenane enenge mende dopa lao piyami.

Embame iki kapa ingyapyamopa
buku rongo pisi doko nyepala
bange porai upi laro palenge dupwa
kapa rokwanyi nembare ingilyamo.
Emba pyao kumakayamisa embena ranjama dokome
wambu dupwa Anatunya lao ropo pyao nyepala
kinyi rara wakale wakalepe
pii wakale ingyuo lengepe
dee wambu rara peparae
Anatunya arapunya nyuo palyii.
10 Embame doloma Anatunya yulu pyakamirami lao
rapu pinginya rara inginyi pyambuinyipa
nakama dupwame yuunya iso kararami.
11 Nambame dee kamba lenge nyuo kandeyono dokopa aŋala yanda kambunde kapa yaka laa narami ingya nayamopa kenane pyao kareyaminyi siyu. Petenge dokona lee renge kisimape wambake lapo pipa karo walya papalu pyuo 12 kenane rekyae lao piyami pyao,

Sipisipi Ikyane piyami doko angingyuo karamo.
Baa keta porainya rengepe singinya rengepe
kamongonge dupwape dee porakai renge palengepe
ketae pyambuo yanga paupau lao pingi dupwape
silyamo dokona lao lakandapenge ingilyamo.
13 Dokopa nambame siyunupa bange wasisi yakena yuunyape dee yuu dokona isa donorena dee ipwa kotana singipi peparaeme kenane pyao dopa pyuo leyami.

Kiŋinya petenge isa andake petamo dokona
dee Sipisipi Ikyane dokonape
yuu peparae lakandao kingi ketae
pyambwaraminyi kararambi ingilyamo.
Nakamba keta yanga paupau lao
porainya rengepe sulu sinya.
14 Dokopa lee renge bange kisima dupwa kinyi kapa leyami. Dokopa akali wambake dupwa wapambu pii pyapala mona kando peteyami.